I år er det hundre år sidan Olav H. Hauge (1908-1994) vart fødd, og med denne boka vil vi feire den sermerkte forfattarskapen hans. Bidragsytarane kjem frå alle kantar av landet, sume frå utlandet, og tilhøyrer vidt ulike aldersgrupper og miljø, men interessa og entusiasmen for Hauge har dei sams.

I boka finst det minne om samværet med skalden frå kjende og kjære forfattarar som Eldrid Lunden og Einar Økland, nylesingar av forfattarskapen av litteraturforskarar som Asbjørn Aarnes og av unge forfattarar som aldri har møtt Hauge i live, men som har vakse opp med dikta hans, som Ruth Lillegraven og Eirik Lodén. Ingrid Stormoen og Gro Dahle kjem med nyskrivne dikt til lyrikaren. Dessutan er det teke med essay som er utypiske for Haugelitteraturen, men som utforskar heilt grunnleggjande sider ved verket hans: drøfting av språksynet åt diktaren og av dei aforistiske siden ved dagboka.