Forlaget skriv om denne boka: Baron Audun Hugleiksson Hestakorn (ca. 1245-1302) var ein av Noregs mektigaste menn på slutten av 1200-talet, då landet hadde si største utstrekning, og Bergen var hovudstad. Han var kongens høgre hand, både under Magnus Lagabøte (1263-80) og Eirik Magnusson (1280-99). Men då Håkon Magnusson vart konge i 1299, vart Audun kasta i fengsel. Etter 3 ½ år i fangeholet, vart han hengd i galgen på Nordnes i Bergen 2. desember 1302. Kva Audun var skulda for er aldri blitt oppklara.
Audun Hugleiksson kom frå Jølster, men var på morssida i slekt med kongehuset. Han var lovkyndig og må ha studert i Bologna og Paris på 1260-talet, og vart den sentrale mannen i det store lovarbeidet på 1270-talet som kong Magnus Lagabøte fekk æra for. Audun var i 1273 kalla den visaste mannen i Landslova, og i 1277 vart han baron. I 1295 forhandla han fram ein avtale med kongen av Frankrike, som berga den norske statskassa frå fallitt.
Audun Hugleiksson var også ein av landets rikaste menn, og på herresetet Hegranes i Jølster bygde han seg eit eineståande slott i stein. Mytene om Audun har levd vidare på folkemunne. Forfattarane av denne boka har granska originalkjeldene og gjev her den første samla framstillinga av livet til Audun Hugleiksson og tida han levde i, basert på ny kunnskap