IVAR MEDAAS var i 60-åra ein av dei mest kjende og populære trubadurane her i landet, songane hans var støtt å høyre i radio, anten dei no var viser eller slagerar. Men så blei det brått stilt frå den kanten. Riktignok blei platene framleis spela, men det blei ikkje laga nye.
Årsaka var ganske enkel: Som odelsgut var Medaas nøydd til å ta over garden då faren blei sjuk.
Men i fjor kom Ivar Medaas attende i plateverda, og ny plate følgde så i år. Og no kjem altså eit utval av dei songane han har hatt på repertoaret gjennom åra, både viser og andre landeplager. Her finst viser av Jakob Sande, Olav Lavik, Halvor J. Sandsdalen, Vidar Sandbeck, Norvald Tveit, Arnljot Eggen. Herbjørn Sørebø og mange fleire. Dei fleste har Ivar Medaas tonesett, nokre få er av Geirr Tveitt. Også kjende utanlandske viser finst her i omsetjing.