Det er byrjinga på det tjuande hundreår, og Karl Gustav Korsnes er 18 år. Familien bur på Korsneset i Tafjordfjella, og driv ein karrig gard utan straum og innlagt vatn der to familiar deler stovehuset. Dei bergar seg så vidt med geitehald. Karl Gustav er nest eldst i søskenflokken. Musikk er ofte den einaste avvekslinga i den tunge og vonlause kvardagen på garden. Mannfolka spelar på heimesnikra feler - alle som ein. Dei er vidgjetne som spelemenn og blir henta til både festar, bryllaup og gravleggingar. Karl Gustav elskar fela si. Han drøymer om ei framtid som musikar, stikk seg bort og spel kvar gong han får ein sjanse. Etter kvart får Karl Gustav ein plass i den kongelege Garde i Kristiania, der han møter både bykulturen og folket. Etter tenestetida, flytter Karl Gustav heim og giftar seg med ungdomskjærleiken Anne Sofie. Han hadde store draumer om framtida, men etter at broren hadde sagt frå seg odelen, må Karl Gustav ta over den karrige garden på Korsneset. Spelemannen frå Korsneset av Gro Røsth er ein lettlesen historisk roman, basert på livet til Karl Gustav Karlsen Korsnes (1883-1942). Han komponerte mange slåttar gjennom heile livet. I biblioteket i Valldal er det arkivert 200 av slåttane hans. Det er Karl Gustav sin lidenskap til musikken som dannar den raude tråden gjennom historia. Romanen er lettlesen og tilpassa ei eldre målgruppe, men kan godt lesast av ein allmenn lesar. Hendingane i romanen vil trigge minne hos dei som har opplevd liknande sjølv, andre vil hugse historier som dei har fått fortalt. Mange vil kjenne igjen dei vanskelege forholda for å drive gardsdrift før i tida. Prosjektet er utvikla i samarbeid med Leser søker bok.
Boka er skriven som ein lettlesen, historisk roman for eldre. Historia er enklare å følgje enn i mange andre bøker, og ho er ein del av Leser søker bok-prosjektet. Forteljinga er basert på livet til musikaren Karl Gustav Karlsen Korsnes, som levde frå 1883 til 1942. Han vaks opp på garden Korsneset i Tafjordfjella, utan straum og innlagt vatn, med skrinn jord og magre dyr. Musikken blir ein av få plassar der Karl Gustav kan finne fridom og glede. Han får etter kvart plass i kongens garde i Kristiania, men han vert kalla heim til garden når eldstebroren seier frå seg odelen, og han giftar seg med ungdomskjærasten Anne Sofie. Det er kjærleiken til musikken som er den raude tråden i denne forteljinga. Omtalen er utarbeidd av BS.
