Hits

I den norske litteraturen om den andre verdskrigen er det ei bok vi har sakna. Det er forskingsverket om den norske krigsleiinga på utefronten og samarbeidet med dei allierte stormaktene.

Her er første delen av verket. Sentrale spørsmål blir reiste. Kva plass hadde Norge i den store krigsalliansen? Kva krigspolitikk hadde den norske regjeringa i London?

Grunnlaget er eit stort unytta norsk materiale, og britiske dokument som nyleg er frigjevne. Dei mykje omtala statsrådsskifta er inngåande drøfta, då Trygve Lie avløyste Halvdan Koht, og Oscar Torp avløyste Birger Ljungberg. Opptakten til dei første hemmelege operasjonane bak fiendelinene i det okkuperte Norge er med, likeins skipinga av Forsvarets Overkommando ved årsskiftet 1941-42. Eit særskilt kapittel tek for seg Trygve Lies "Atlanterhavspolitikk", som sikta mot eit nært samarbeid med vestmaktene også etter krigen. Tilhøvet mellom regjeringa og heimefronten blir drøfta, vidare vanskane som kom i samarbeidet med britane på grunn av britiske invasjonsplanar og raid på norskekysten. Boka fører fram til hausten 1942, og blir sidan følgd av eitt band til.

"London-regjeringa" II

Dette er andre og siste bandet av Olav Ristes store forskningsverk om den norske krigsleiinga på utefronten og samarbeidet med dei allierte stormaktene. Ein av dei store kvite flekkene i historia om Norge under den andre verdskrigen er hermed dekt.

I dette bandet følgjer vi først diskusjonen om heimefrontens kampformer, og avklaringa av det vanskelege tilhøvet mellom regjeringa og heimefrontleiinga - her sett frå utefrontens synsstad. Vidare kan vi følgje den allierte og norske planlegginga for Norges frigjering, der faren for væpna tysk motstand var det trugande spørsmålet. Vi får ei utførleg framstilling av det storpolitiske spelet kring frigjeringa av Nord-Norge, med grunnlag i eit omfattande og hittil unytta britisk og norsk materiale. Siste delen av boka tek opp tråden frå "Atlanterhavspolitikken" i dei to første krigsåra, og gir ein inngåande analyse av utviklinga i norsk tryggingspolitikk fram til sommaren 1945. Eit særskilt kapittel gir den første utførlege analysen av dei topp-hemmelege Svalbard-forhandlingane mellom Norge og Sovjetunionen siste krigsvinteren. Boka sluttar med ein konklusjon som stiller i relieff den alliansepolitikken den norske regjeringa førte, og den posisjon dette gav Norge blant dei allierte.